FCC Thuanthu Tawi

Pa Nah Mang

Falam Christian Community (FCC) Tin Jubilee thleng tiang lam in hruaitu kan Pathian thangthat in um ko seh.

Falam mi pawlin Falam Christian Community ti in Pathian thangthatnak kan neihnak hi Pathian in 2005 August 13 ni ah Rev. Za Thelh Lo hmang in Malaysia ram Kuala Lumpur Jalan Alor ih Tuluk rawldawr ah mi (72) thawn Falam Christian Community timi hmin hmang in Pathian thangthatnak kan nei ding a si tin hminsak thlacam tlangnak le rawl eitlangnak an neih ni ihsin hram a thokmi a si.

Tumtah mi

Mi zozo khal Pathian thu an thei ih rundam an si theinak ding hrangah Khrih ih rundamnak thuthangtha sim nak le, miphun thleidannak um lo Khawhhran thleidannak um lo leh lungrualten thinlung hmunkhat nei in Pastor kaihhruainak sungah Pathian thangthat tlang ding ti hi a si.

Kuala Lumpur Baptist Church (KLBC) ih kan khawm thei nak

Khuala Lumpur Baptist Church ih kan khawm thei nak dingah 2003 kum ah Levi Sap NeiThang in KLBC Senior Pastor Rev. John Kok hnen ah le PJ Baptist Community Church pastor Richard Tu hnenah in simsak nan thurel saknak umloin kum kan liam.

2004 kum a hung thar, kan harsatnak a khung deuhdeuh tikah kan khawmnak ih naibik KLBC hnen ah bomnak in dil sak dingah KLBC ih a khawm rero zotu Myanmar Christian Felowship ih Senior Pastor Rev. Dr. Winne Zantha (Kachin nu) hnen ah Rev. Za Thelh Lo, Saya Aye Win, Sen Hngilh Piang, Bawi Nun Sang, Bawi Hre le Pu Nah Mang pawl in an va leng. Dr. Winne khal in KLBC ah in va simsak nan a tawnte ah ziang thu hman relsak nak a um lo.

Asinan KLBC Pastor, Myanmar Christian Fellowship ih Pastor leh hruaitu pawl thureltlangnak an neihfel hnu 2004 October 08 ni ah kan lo kilkhawi dingih khawmawk nak Chapel kan lo sansak ding ti thu kan Pastor Rev. Za Thelh Lo hnen ihsin thu in theih ter.

2005 January 01 kumthar ihsin in sansakmi Chapel ah kan khawm ih atu ni tiang KLBC thlazar hnuai ah Pathian Bawipa ih thlawsuah siar phah in Falam mi pawl kan khawmawk thei nak a si.

Pa Nah Mang

Ref: FCC Tin Jubilee Shekhem Mekazin (2015), Page No. 132