Zumtu ih Hrial ding (4) le Tuah idng (3)

Rev. Run Cung Mang

---

Thuhmaihruai:

Jesuh in leitlun a ratsan cu hiti'n a sim: "Kei cu nunnak an ngah ih tlamtlingzet ih an neihnak dingah ka ra," (Johan 10:10). Pathian ih in sersiam, in rundam le in hrilnak sanbik cu hih leitlun caan tawite kan nunnak ah amah theitu, lungawitertu le a hmin sunlawitertu kan si ding hi a si. Cuti ih Pathian hmin sunlawitertu le a ram karhzaitertu kan si theinak dingah kan hrial dingmi le kan thun dingmi Ca Thianghlim sungah in khihhmuh a si.

"Hlawhtling Christian Nun" neitu kan si theinak dingah zumtu pawl in kan tuah lo dingmi asilole kan hrial dingmi 4: soiselnak (criticize), nonnak (condemn), phunzainak (complain), le midang thawn tahthim awknak (compare) tla an si. Zumtu in kan hrial dingmi lawng si loin kan tuah dingmi khal 3: zaangfah zawnruahnak (compassion), helhkamnak (concern), le tuamhlawmnak (care) pawl hi an si. Zumtu in kan tuah lo dingmi pawl kan theih ih tuah loin kan hrial thei ding le kan tuah dingmi pawl kan theih ih taimazet ih kan tuah ahcun mi lungawi le mi thluasuak kan si ding. Bibal sirhsan in kan zirzoi tlang pei.

---

A. Hrial dingmi pawl:

1. Mi va soisel hlah (Don't Criticize) [Luka 6:37a]

"Mi va soisel hlah, Pathian in a lo soisel ve lo ding" (Luka 6:37a). Midang soisel hi a tha lo. natuanpi le midang na soisel asile thanaunak, ngolnak le buainak a suak ding.

Soiselnak in thil tha a suahpi dah lo, rem awk lonak le buainak suahtertu a si. "Na kutzung mi na khih asile, a taangmi kutzung pawl in nangmah an lo khih a si." Curuangah nitin kan nun ah midang ih thatnak lawng zoh thiam in soiselnak kan hrial thei asile innsang, kawhhran le khuatlang nun ah remdaihnak le thansonak a um ding.

2. Mi va hnong hlah (don't condemn) [Luka 6:37b]

Jesuh in, "Midang va hnong hlah, Pathian in a lo hnong ve lo ding," a ti (Luka 6:37b).

Zumtu cun midang ziang siar loih hnong ding kan si lo. Mi pakhat in thil tisual a neih pang khal le mi hmai ah ningzak mualpho ko mawhsiat lo ding. An hrangah thlacam sak in a cang theibik in thazaang pek ding sawn a si.

Mi na hnong asile hnon na tuar ve leh tengteng ding. Mi zovek te khal duhdawtnak le zawnruahnak thawn pawlkom in zoh that tum aw. Pathian thluasuah donnak le mi ih duhdawt zaangfah conak thuthup a si.

3. Vuivai hlah (don't complain) [Filipi 2:14]

Zumtu eu lungawithu sim thiam dingin ruangzingmi kan si (1 Thess. 5:18).

Pathian in phunzaitu si ding in duhsak lo. Israel mi pawl an vuivaituk ruangah nunsim an tong (Suah.16:7-8; Mipum. 14:27-29). Paul in, "Mi hrekkhat an phunzai ciamco bangtuk in kannih kan phunzai ve ding a si lo. Cuti ih an phunzai ruangah siatsuah thluh an si," a ti (1 Kor. 10:10). "Ziang nan tuah khal ah phunzai rero lo le el aw rero loin tuah uh" (Filipi 2:14).

4. Mi thawn Tahthim aw hlah (don't compare with others) [Gal. 6:4]

Paul in, "Zozo khal nanmah ih ziaza cio parah thuthen aw ding nan si. A tha asile midang ih nundan thawn tahthim awk tul rero loin nanmahte nan lung a hmui ding," a ti (Gal. 6:4).

Nun lungawinak le diriamnak thuthup cu Pathian hnenih lungawithusim hi a si. Midang nahsik ih mah le mah lungkim aw tawk loin, midang thawn va tahthim awk khi thinnaunak a si. Curuangah zumtu cu mai' sinak ah lungkim in Pathian rinsan le taimak suah ih zuam ding kan si.

B. Tuah dingmi pawl:

1. Zaangfah Thinpemnak (compassion) [Matt. 9:36; 1Pet. 3:8]

Zumtu cu midang parah zaangfah lainatnak thinlung nei dingah Pathian in in duhsak. Cumi cu kan Bawipa Jesuh ih mizia a keneh kan thlun dingih in zirh le thlun dingih in zohthim ding in taantami a si.

Peter in hmuntin ih zumtu pawl hnenah, "A netnak ih ka lo forh duhmi cu: ruahnak khat le thinlung khat in um uh; unau bangin pakhat le pakhat duhdaw aw uhla zaangfahnak nei in thinlung neem in um uh," a ti (1 Pet. 3:8). Peter in a Bawipa ih thinlungput vek a nei ve. Matt. 9:36 ah, "Misenpi pawl a hmuh tikah khaaltu nei lo tuu bangtuk in rethei le oloksong ih an um ruangah an parah zaangfahnak tampi a nei," tỉn kan hmu.

2. Theihpi Helhkam ding (concern)[Phi. 4:14, 15]

Innsang ah, kawhhran ah, le pawlkom sungah seherh awknak le helhkam awknak neih ding hi a thupi ngaingai.

Paul in a thuthantha simnak ah a natuan a theihpi ih a bawmtu Filipi kawhhran: hnenah a lungawithu a sim: "Harsatnak ka ton caan ah in rak bom thei cu nan tithazet a si. Thuthangtha phuang dingih ka rak thok pek hrawngah in bawmtu kawhhran cu nanmah lawng nan si. Ka sunnak le ka hlawknak ah nanmah hi in theihpitubik nan si," a ti (Phil 4:14, 15).

3. Zawnruahnak (care) [1 Cor. 12:25; 2 Cor. 11:28]

Kawhhran thansonak dingah sungtel pakhat le pakhat zawnruah awkton ding hi a thupizet.

Bibal in, "Taksa then pakhat le pakhat parah zawnruahnak an nei sawn a si. Taksa then pakhat in a tuar ahcun taksa then dang khal in an tuarpi ve a si (1 Cor. 12:25-26). Paul in Korin kawhhran hnenah, "Thil dang thu rel thei loin kawhhran zawn ka ruahnak hrimhrim in i nen," a ti (2 Cor. 11:28).

Thunetnak:

Zumtu nitin kan nunnak ah lungawinak, thlangam daihnak, thanlen pitlinnak le hlawhtlinnak co kan duh asile Jesuh Khrih zumhnget in, Pathian thangthat le lungawithu simnak nei aw. Satan in a tukforh thei lomi cu lungawithusim nun neitu thlaraumi pawl khi an si.

Pathian Thu thun in tuah hlah uh, in timi hrial le tuah uh in timi ti tento ih kan tuah ringringnak in kan thlarau nun in kilkhawi ding. Pathian lungawitertu le midang lungawi tertu kan si ding.

-rcmang@gmail.com

Rev. Run Cung Mang

Ref: FCC Tin Jubilee Shekhem Mekazin (2015), Page No. 101

•++++•